Ylýas Amangeldi

AGLAMAK

Ýaşaýyşyň 

Gözbaşyna meňzeýän gözlerden

Gözýaşyň

Dökmek kynmy näme?

Içi suwdan doly iki deşikden,

Damjajyklar syzdyrmak,

Kynmy näme?

Ataň ölende aglamak,

Eneň ölende aglamak,

Dostuňy, mähribanyňy, balaňy...

Ýitireňde aglamak,

Kynmy näme?

Duýman durkaň,

Iň agyryk ýeriňe

Ursalar,

Ilki gözüňden ot syçyrap,

Soňam ajy damjalar damar, damar...

Ýüregiň, bedeniň damar-damar,

Her damardan birje damja

Ýazyklaryňa meňzäp,

Ýa meňzäp näzikligiňe

Damar...

Aglamak kynmy nämä?

Aňsatmy näme?

GELJEGIME BAKÝARYN

Geljegiňe bakaňda gözden peýda ýok.

Sokur gözli kör ýaly bakan bolýaň,

Emma hiç zat görnenok.

Geljek köçe däl, ýol ýa ýoda däl.

Ol gözýetim bilen gutaranok.

Onda giňişlik ýok, sowuk, gyzgyn ýok.

Şonda-da oňa bakmakdan araňok.

Bir zatlar görünýän ýaly, gözüňe däl aňyňa.

Barýaň ýanyna. Ýa ony getirýäň ýanyňa.

Geljege bakan wagtyň bu mümkin. Ol şu günüň däl.

Onda hemme zat erkiňe boýun.

Nähili geň bu oýun!

Geljege aň bilen bakýaň.

Garrylyk, soň barynyň gutarşy,

Çagajyklaň ulaljagny görýärsiň.

Ýa görmeýärmikäň?

Iň ýönekeýi – kakam barka onuň boljamajakdygny,

Heý gördümmikäm?

Görmändirin. Gördimmikäm diýsemem... 

Nähili geň!

Seniň şu günki ýaşap duran günüňem,

Düýnki görüp bilmedik geljegiň.

Ony görmek mümkin däl.

Şonda-da sokur gözli kör ýaly bakan bolýaň.

GARAŞANYM ÜÇIN BAGYŞLA

Garaşanym üçin bagyşla.

Garaşmaly däldim men.

Duýup garaşýandygmy

Geljek bolansyň gelmeseňem.

Gelme senem.

Gelmedikler kän bolupdy, gelenlerden.

Men bütin ömrüme garaşyp ýörün,

Hasabyn ýöredip gelenleriň hem

Gelmesemem bolar diýenleriň.

Gelme senem,

Gelseňem, gelmeseňem

Üýtgejek zadam ýok ýaly.

Süýşmez ahyr daglaryň gary?

Seniňki dogry...

Garaşanym üçin bagyşla meni.

* * *

Bu dünýeden gowy dünýe barmyka

Söwer ýary söýmek,

Söýdürmek üçin?

Çünki gije ýyldyzlaram,

Gözlerin näz bilen gypyşýar.

Bu dünýeden gowy dünýe barmyka

Dostdugyňy tanatmak,

Dostuňy tanamak üçin?

Çünki menziller uzak,

Gözýetimde kötel ýollar tapyşýar.

Bu dünýeden gowy dünýe barmyka

Girip-çykyp, ýaşap ýörmegiň üçin?

Çünki hiç kimden minnetsiz,

Wagtly wagtynda

Gün dogup ýaşýar.

Bu dünýede şa bol, ýa bol sen geda,

Söýgüliňe gowuş, ýa düş sen jyda,

Ýapyşarsyň her demiňe,

Diýersiň ýyrtyp ýakaň,

Bu dünýeden gowy dünýe barmyka?!

Bir günem hassasyň, ýatansyň,

Tükeniksiz gaýgy-gussa batansyň,

Ýene-de geler şol sowal,

Bu dünýeden gowy dünýe barmyka?

Ine-de alyp gitdiler, başga bir dünýä baka.

Taşladyň ýaryňy, söwer dostuňy,

Şalygy, gedalygy,

Misli barysy hiç eken.

Emma şeýdip gitmek üçin,

Bu dünýeden gowy dünýe barmyka?

GIDEMDE

Alyp gitjek zadym ýok gidemde,

Näme ýogsa alyp giderim ýaly,

Getiripmidim?

Geýen egin-başlarym,

Höwürtgäm,

Höwürtgämde guşlarym...

Deňi-duş, syrdaşlarym

Men näme sizi getiripmidim?

Hatda çagalykda oýnan oýnumam,

Bilmerin goýman.

Enemiň ak süýdüne boýalana meňzeýän

Ak kepene dolanyp,

Giderin mähelläň egninde oýnap

Oýnap, oýnap, oýnap.

Bu bolup barşymy görenler,

Bilseler okap aýat,

Bolarlar şaýat.

Hem diýerler:

„Bar zadyny goýup barýan

Bir ejiz biçärä däl,

Tersine,

Bir bagty çüwene meňzeýär,

Bolup barşyny görsene.“ 

Ine şeýdip giderin men gidemde,

Ine şeýdip gideýin men gidemde...

ZYÝARAT

Ululy-kiçili, biri has täze,

Birisi könelşen, biri çöküpdir.

Üstleri gussa bilen örtülen,

Birgiden tümmekler

Birgiden tümlükler...

Mesaýy söhbete girişip bilmän,

Biz olaryň arasyndan barýarys.

Bu giden mähelläň köpüsi

Bize nätanyş. Şonda-da

Dykkat bilen seredýäris,

O gubura, bu gubura.

Hem geçip barýarys ýüzugra.

Ine-de deňine ýetdik görjeklermiziň.

Görüp bilmejeklermiziň.

Görüşip bilmejeklermiziň,

Gülüşip bilmejeklermiziň,

Görünmeýänlermiziň.

Görmeýänlermiziň.

Oturdyk aýat okadyk.

Olara Allahdan iman diledik,

Hemem özümize.

Çalaja ýaş aýlandy käbirimiziň

Gözümize...

Soň dolandyk öýümize...

Şeýdip aram-aram zyýarata gidilýär

Görüp bilmejeklermize,

Görüşip bilmejeklermize,

Gülüşip bilmejeklermize,

Görünmeýänlermize.

Görýänlermize.

Aşgabat. 2007.