Magtymgulynyň barada aýdylanlardan

Magtymgulynyň öňe süren ruhy ýörelgesi, ynsap, päklik, erkinlik, adalatlylyk ýörelgeleri türkmen halky üçin şu günem juda-juda gymmatly bolmagynda galýar. Ol biziň gurjak bagtly ertirimizde-de şeýle bolar. (Saparmyrat Türkmenbaşy).

Magtymguly türkmeniň poeziýasynda gymmatbaha daşlaryň biri bolup, ol biziň zamanamyzda täze ýüzügiň gaşynda gözüňi gamaşdyryjy şöhlesi bilen lowurdaýar. (Professor E.E. Bertels). 

Iňlisde meşhur Wilýam Şekspire deňelen ýekeje şahyr bar. Ol - Magtymgyly. (Braýan Oldis).

Onuň (Magtymgulynyň) kitaby, Kurandan soň türkmenleriň arasynda uzak wagtlap ikinji orny eýelejekdir.. Magtymgulynyň eserleriniň biziň üçin gymmatlygy onda türkmen diliniň örän sap nusgalarynyň barlygyndadyr. Bu hili nusgalary onuň at, ýarag hakynda we ş.m. temalara bagyşlap ýazan şygyrlarynda görmek bolýar. Munuň ýaly ýagdaý gündogar halklarynyň edebiýatynda juda seýrek duş gelýär.

Toý-tomguda ýa-da ýönekeý bir üýşmeleňde Magtymgulynyň aýdymlaryndan aýdýan bagşyny diňlemek miýesser gelen pursatlary meniň aňymda asla ýitmejek täsir galdyrdy. Biz Etrekdekäk şonuň ýaly bagşylaryň biri biziň öz çadyryny gurdy. Günlerde bir gün ol özüniň dutary bilen agşamara biziňkä geldi. Az wagtyň içinde ýaş ýetginjekleriň bir topary onuň daşyny gurşap alany üçin haýsy-da bolsa gahrymançylyk hakyndaky aýdymlaryň birini aýtmaly boldy. Ol ilki bada dutaryň taryna ýuwaş we sallamly kakyp, bogazyna salyp hiňlenmäge başlady, bu aýdym däl-de hor çekmäge meňzeýärdi. Emma gyzyşandan soňra, dutaryna örän batly kakyp, sesi örän çasly çykmaga başlady. Tarypy edilýän söweş gazaplaşdygy saýyn, bagşynyň we töweregindäki diňleýjileriň gitdigiçe ruhlary barha göterilip başlady. Soňra ýaş çarwalar agraslyk bilen dem alyp, telpeklerini ýere urup, guduz açan ýaly saçlaryny penjeläp, öz-özleri bilen söweşe giren ýaly boldular. (Professor A. Wamberi).

Magtymguly irmän-arman işläpdir, halkyna hyzmat edip, ölmez-ýitmez eserler döredipdir, dünýä edebiýatynyň egsilmez hazynasyna öz goşandyny goşupdyr. Halk öz şahyryny söýüpdir, onuň düzen her bir setirini gyzyla gaplan ýaly edip nesilden-nesle geçiripdir. Sebäbi ol il-gün üçin, ýurt üçin hyzmat edipdir, halkyň duşmanlaryny ýakyp-ýandyryjy ýiti setirleri bilen paş edipdir. Şonuň üçinde şahyryň işleýän ussahanasy, ýaşan hüjresi döredijilik öýüne öwrülipdir, kim muşagra aýdyşypdyr, kim muamma düzüşipdir.

Türkmen topragynyň dürli künçlerinden kim atly, kim düýeli, kim eşekli şahyryň täze-täze eserlerini diňlemek üçin, göçürip almak üçin, ýat tutmakdan ötri gelýänleriň yzy üzülmändir. Çünki halk ony özüniň söýgüli şahyry, pähimli maslahatçysy, sarsmaz hemaýatçysy diýip tanaýar.Onuň eserleri bagşylaryň dilinde, şahyrlaryň setirlerinde, jemagatyň aňynda ýurduň ähli künçlerinde belent owaz bilen ýaňlanýar. Şeýlelikde, beýik pähimdaryň özünden soňkulara “ýadygär galdyran” altyn fondy onuň hakyky eýelerine, türkmen halkyna gelip ýetdi. (Professor Mäti Kösäýew).

Magtymguly bütindünýä poeziýasynyň genji-hazynasyna giren şahsyýet, goşgy bilen gürlän akyldardyr. (Resul Gamzatow).

Onuň şöhraty indi bütin dünýä ýüzüne doldy. (Nikolaý Tihonow).