EKIP GEÇDI

Owwal Adam indi dünýä,

Bu dünýäni ekip geçdi.

Her pygamber bir kesp açdy,

Kesbin mydam edip geçdi.

Bela geldi lenber-lenber,

Doga kyldy anbar-anbar,

Öz döwründe Nuh pygamber

Nejjar işin turup geçdi.

Ezraýyla janyn beren,

Anyň bilen söhbet guran,

Jennet içre diri giren

Idris köýnek tikip geçdi.

Tä Isa gelinçä daýym,

Esaby-kehf yatar gaýym,

Hakyn ýolunda Ybraýym

Janyn oda ýakyp geçdi.

Zaty egri gönenmedi,

Asla dogrular dönmedi,

Gurt Eýýubyn tenin iýdi,

Iblis şonça nikb geçdi.

Süleýmanyň aly jahy,

Tört ýüz gurular bargähi,

Ynsyň, jynsyň patyşahy,

Ol hem zenbil dokyp geçdi.

Tur dagy diýr, düşer ýola,

Raz aýdyşar huda bile,

Asasyn göterip gola,

Musa goýun bakyp geçdi.

Kabys dagynyň burnunda,

Oglun tapmady ornunda,

Ýunus balygyň garnynda

“Ente subhan” okyp geçdi.